ولادة سمير

تحكي لنا أم سمير قصة و لادتها في سمير.......

---

ابا احكيكم قصه ولادتي في ولدي سمير

ولد في يوم الثلاثاء ٢٨/٣/٢٠١٧ كان الاسبوع ال٤١ في الحمل ، اخر موعد للدكتور في يوم ٢٣/٣ الدكتور فحصني لقى الرحم مقفل و شاف مويه البيبي و قلي حاعطيكي اسبوع مهله اذا ما جاكي طلق بعطيكي طلق صناعي ماينفع يجلس اكثر ، و اعطاني موعد مبدأي على يوم ٢٧/٣ يوم الاثنين ادخل المستشفى الساعه ١١ في الليل عشان الطلق الصناعي ، انا طبعا مرا ما اتوترت و قلت اني ماني رايحه الموعد و سرنا انا و زوجي كل يوم نمشي في الممشى الين يتنفخ جسمي زياده و اوصل مرحله مااقدر امشي خلاص ومع دا كلو ما احس الا ببراكسون هيكس ، طلقه وحده مؤلمه و بس او طلق مو منتظم و خفيف و يختفي بسرعه ، الين جا اليوم المنتظر يوم الاتنين.

صحيت الصباح نزلت مني افرازات بيضاء و بعدها نزلت افرازات لونها على بني او عودي ، و بعدها بدأ معايا الم ، قمت اتحممت و برضو ماراح الالم بدأت انبسط صراحه مع الالم اللي حاسته ، و سار يزيد و يزيد الى سارت الساعه ٩ م و سار بين كل طلقه و طلقه ٥ دقايق و الطلق مؤلم ، اتصلت على الدكتور قلي تعالي المستشفى قبل موعد الطلق الصناعي لانه كان محدد في نفس اليوم الساعه ١١ ، الساعه ١٠ و نص انا في المستشفى ، دخلوني و لما فحصو طلع الرحم مقفل بعد دا كلو ، جلست في المستشفى الى الساعه ٧ الصباح الطلق حامي و مؤلم جدا ، بس ما فتح الا ١ او ١ ونص ، كانت سياسه المستشفى انه التخطيط لازم يكون عليا ، بس كنت وقتها اقولهم ابا اروح الحمام و انتو بكرامه و ادخل الحمام و اقوم اعمل تمارين القرفصاء و ارجع تاني ، بس الحق ينقال جهاز التخطيط ساعدني اني اصبر شويه وقت الطلق و خلاني اعرف متى الطلقه ممكن تنتهي و الشي الثاني اللي ساعدني وقت الطلق التنفس البطني ، مرا مفيد و اكثر شي ساعدني اني اتحمل طول دي الفترة يخفف الالم كثير كنت اذا توترت مع الطلقة و شديت جسمي اتألم زياده ، يروح زوجي يذكرني بالتنفس اروح ارجع اتذكر و اخد نفس عميق و اخرجه و كنت احاول اخد غفوات بين الطلقات ، الساعه ٧ طلبت ابره الظهر من قوه الطلق ، اعطوني هيا و ارتحت مرا صراحه بس الرحم مافتح زياده حتى الساعه ١ الظهر سار ٣ سم ، الساعه ٣ خرج زوجي يشتري قهوه و انا جالسه في السرير و اسمع نبض البيبي في جهاز التخطيط بدأ نبضه يبطئ فجاه و رجع ثاني بعد ثواني انا انفجعت ، رجع زوجي و قلت له اللي حصل و رجع سمعه ثاني تقريبا على الساعه ٤ ونص ، جا الدكتور يشيك عليا الساعه ٥ و قلنا له على موضوع النبض مع انه النبض لحظتها رجع طبيعي قال خليني افحص و فحص قال الرحم مفتوح ١٠ سم و على فكره قبلها بشويه جرعه ابره الظهر انتهت و بدأ الاحساس يرجعلي ، فقلت للدكتور انه ما يحتاج جرعه زياده ، مع انه البيبي ماكان نازل في الحوض بس سرت احس بالطلق و احس بشي يدف من جوا ، مع كل طلق كنت ادف و لما تروح الطلقه احاول اتنفس التنفس البطني و ارجع ادف ثاني مع الطلقه اللي بعدها و الدكتور كان طول الوقت بالجل يحطه على الفتحه نفسها و يعمل مساج للمنطقه ، فجاه النبض حق البيبي رجع ثاني يبطئ و يبطئ، انا اتوترت ، سار يقوللي الدكتور حاولي تدفي اقوى لانه اذا زاد الموضوع حاضطر اتدخل و استخدم الشفاط ، انا رفضت و كان عليا اتحول قيصري و لا يستخدم الشفاط ، وقتها لاحظت شي السرير كان مسدوح ، طلبت منه يرفعه و رفعلي هوا شويا سرت ادف و ادف و نبض البيبي لسه بطيء حتى وصل ٧٠، الدكتور قال لي حاعطيكي فرصه و بعدها حاتدخل ، فقلت للدكتور يرفعه السرير زاويه قائمه ، فرفعوه الى اخر شي ، حسيت اني سرت اتحكم احسن في الدف و رجعت مع الطلقه ادف و فجاه رجع النبض ثاني طبيعي و دفيت بعدها دفتين و خرج النونو و حسيت براحه و فراااغ.

مع انه الدكتور قص الحبل السري بنفسه لانه كانت حاله طارئه البيبي اخد وقت طويل نبضه بطيء و خرج ما بكي بسرعه حتى شفطوا منه كل المويات بعدها بكي الحمدلله ، اعطاني و حطوه على صدري و رضعته اول رضعه بعدها بثلث ساعه ، طبعا البيبي جلس معايا في غرفه الولاده ساعه و شويا ، في الساعه الدكتور اعطاني بنج موضعي و بدأ يخيط جرح الولاده ، الشق كان من الدرجه الثانيه الحمدلله ، اعرف انه كثير بيقولوا اني ممكن طولت كثير في المستشفى او اتعذبت كثير.

انا اشوف لاني حضرت كورس اماني بيرث و كنت اقرأ كثير طول فتره الحمل ، فكنت ٧٠٪‏ متحكمه في نفسي ، اكثر شي فادني في الوقت دا كله ، التنفس البطني وقت الطلق يخفف الالم كثير و يخليكي مركزه ، و وقت الدف السرير لما رفعناه ساعدني جدا و حلاني اتحكم اكثر بعضلاتي ، و تمارين كيجل و ما ادراكم ما تمارين كيجل , وقت الدف حتعرفو قيمتها ، لاني من قبل ما اتزوج و انا مداومه عليها ، حتخليكم تعرفو تتحكمو في عضلات المهبل مضبوط ، و شي ثاني ..

صح انه احيانا كنت اتضايق من جهاز التخطيط بس دا من الاشياء اللي فادتني اعرف متى الطلقه تنتهي و يصبرني شويه و الشي الثاني عرفت منه انه نبض البيبي بدأ يقل، و الدكتور ساعدني بعمل المساج بالجل طول فتره الدف و ابره الظهر اللي ساعدتني اعدي ساعات الالم الطويله بس وقت الجد من حظي انه قبلها بوقت خلصت الجرعه فكنت حاضره بكل حواسي وقت الدف الحمدلله على كل شي.

الحمدلله كثيرا