السلام عليكم ورحمة الله وبركاته
الحمدلله الذي بحمده تتم الصالحات..
ولدت بالاسبوع ٣٨ و٥ ايام ولادة طبيعية لجنين بوضعية مقعدية بفضل الله..
عرفت انه مقعدي بالثامن بدايته او وسطه تقريبا وقالوا لي لا تشيلي هم اغلبهم بالتاسع يقلبوا رأسي، دكتورة نصحتني ابدأ تمارين المقعدي احتياط ووحدة قالت مو لازم اكيد يقلب..
بديت بالتمارين من اخر الثامن ووقفتها بعد فترة حسبته قلب اعتمدت على حدسي وطلع غلط وعلى بداية التاسع اكتشفت انه باقي جالس، شديت حيلي اكثر بكل تمارين المقعدي وبوسط التاسع اخذت جلسة عند كايروبراكتر تعمل تقنية ويبستر اللي تساعد بارخاء الاربطة اللي ممكن بعدها تساعد الجنين يقلب لان صار عنده مساحة..
الاربطة ارتخت وراح الشد والالم اللي كنت احس فيه بس ما غير وضعيته.
ما حبيت اسوي الاجراء الطبي بقلب الجنين في المستشفى لما يلفوه بيدهم ويخلوه رأسي عشان لها مضاعفات وعشان فيه نسبة يرجع مقعدي بعدها غير انها مؤلمة جدا..
وبكل الاحوال ولادته طبيعي كمقعدي مافيها مخاطرة وكثير ولدوا كذا منهم انا امي جابتني مقعدي برجولي وجدتي كمان جابت امي بوضعية مقعدي قدمية وكثيرغيرهم، طمنتني كثير كمان تجارب القنوات وقصصهم وتطمنت كمان ان التمزق فيه مو اكثر من الرأسي وانه مثله يعتمد عالوضعية وغيره فاستخرت الله وتوكلت عليه وكنت موقنة ما حيردني خايبة واحاول اتفاءل (ما انكر جاتني من الشيطان لحظات كثير خوف وبكاء بالتاسع خصوصا اني ما توقعت يكمل مقعدي للولادة بس سبحان الله كله خير وكنت احاول وقتها اكثر دعاء واحسن الظن بالله)
قبل ولادتي بيومين سويت سونار عشان دكتورتي قالت لازم اعرف مقاس راسه ووزنه اذا مو كبير ومناسب اولده مقعدي وخصوصا اني بكرية وسويت السونار رغم اني اعرف ان ما يهم الوزن ومقاس الراس دام وزنه مو قرابة ٤ كيلو وكثير كمان ولدوا بوزن كذا واعلى، وصارحتني الدكتورة بعد ولادتي انه ما يفرق اذا بكرية ولا لا بولادة المقعدي وانه زي الرأسي وعادي.
عموما طلع وزنه ٢٧٠٠ بالسونار (وبعد الولادة ٢٨٠٠) وقالت قياساته مناسبة، طلبت تفحصني فحص داخلي عشان تعرف اذا حوضي مناسب لولادة مقعدي عشاني ما قد ولدت قبل ورفضت قلت لها ما يمدي يبين وقالت خلاص تمام حولدك بس بكل الاحوال توقعي على مسؤوليتك..
وبشكل عام هي كانت خبرة بالمقعدي، دكتورة مصرية تقول بمصر يولدوا طبيعي مقعدي كثير سواء بكريات او غير بكريات وان كلهم خبرة فيه مو مثل هنا يخافون.
ووقتها ما لقيت دكتورة غيرها ولا فيني ادور وارتحت لها وللمستشفى وخصوصا ان حسيت فيها تدين وكانت فعلا طول ولادتي ما وقفت ذكر لله ودعاء ابدا ماشاءالله.
بالنسبة للاكل كنت اكل تمر ورطب كل حملي لان احبه وكمان مكسرات، بس ما اكلت او شربت اشياء ملينة مثل يانسون وغيره ما كنت كثير مهتمة بس افكر بوضعيته غير اني اشوفها من باب زايد لان الرحم وعنق الرحم مصيره مع الولادة يصير لين ويفتح ما اشوف يحتاج اني اشرب شي عشانه، ولا كنت امشي او اطلع درج بس اسوي تمارين مقعدي لان كنت خايفة اساعده ينزل الحوض بنفس وضعيته بس سبحان الله كان ينزل بكل الاحوال..
للعلم وضعيته كانت بريتش فرانك يعني مقعدي وساقه ممتدة فوق وقدمه فوق عند راسه.
———
قبل الولادة بيومين بدأ معايا مثل تعب الدورة وانام كثير وبدت تنزل السدادة على دفعات قليلة وبالليل كانت تجيني كم طلقة خفيفة وتوقف باقي اليوم.
يوم الولادة صارت تنزل طول اليوم قطع اكبر واكثر من السدادة (اللي هي افرازات صفراء لزجة ثقيلة مع خيوط دم)
بداية الطلق ١١ ونص مساء جاتني نغزة قوية مؤلمة ببطني فاستلقيت وجاتني طلقتين او ثلاث متباعدة شوي وكنت باقي مو متأكدة ١٠٠٪ انها طلقات لكن بديت اشك.
الطلقات كانت تجيني على هيئة الم اسفل البطن واسفل الظهر شديد (لان وضعيته كانت ظهره ع ظهري) مقدر اتحرك اثناءها، زي الموجة يبدأ خفيف ثم يزيد لين يصير شديد مره ويرجع يخف بالتدريج ويختفي تماما.
بعدها جاتني حوالي ٤ طلقات بينهم دقايق وكنت لازم اثناءهم اجلس من الالم وتاكدت انه طلق ولادة، بس كان المه مو مره شديد لسا بس متتابع لكن ما كنت احسب لان بدأ دوبه رغم ان امي مصرة احسب طلقي وانا ما ودي احسب لين يشد اكثر..
الطلقات كملت كذا متتابعة بس بعد حوالي ساعة يعني على ١٢ وشوي صارت تزيد شدة المها مرره واحتجت استخدم طرق تخفيف الالم الطبيعية..
بما انه بداية الطلقات فما كان ودي ارهق نفسي برياضة فرحت انسدحت على السرير على جمبي اليسار وحطيت مخدات بين ركبي وفخوذي ومخدة تحت يدي واحاول ارخي جسمي واسترخي وما اشد وقت الطلقة عشان ما يزيد الالم، احاول قدر الامكان رغم الالم اتنفس اخذ نفس عميق واطلع بشويش (شمي وردة طفي شمعة) الحقيقة مو كل طلقة قدرت اسوي كذا، مرات اون معد اتحمل الالم او بس ادعي يارب يارب ، اثناء الطلقة كنت محتاجة جدا احد يضغط على اسفل ظهري كان يخفف الالم مرره لما يسووها امي او زوجي.
للعلم بهذه الفترة كانت المدة بين الطلقات مو متساوية، يعني مره ٧ دقايق ومره ٣ ومره ٤ ومره ٨، ومدة الطلقات غالبا قرابة دقيقة بس كانت تجي طلقات قصيرة ٣٠ او ٤٠ ثانية..
بعدها عبينا البانيو مويه حارة مع ملح الابسوم جلست فيها مرره ساعدني بتخفيف الم الطلق لكن كان شوي ضيق من ناحية العرض فمو مره كنت مرتاحة بوضعياتي وقتها ما كنت اعرف ايش اسوي وضعية تريحني وقت الطلقة، كنت اتكي راسي على طرف البانيو احيانا لين تعدي الطلقة وانا متربعة، مع الوقت كانت تشد الطلقات واستفرغت وقتها وانتوا بكرامة طلع كل اللي ببطني من اكل..
كنت طول طلقي احاول كل شوي اروح للحمام اصفي المثانة وكنت احاول اشرب مويه مع ان احس ما شربت كثير، واكلت شوي مره من كرات التمر وشوي شمام لان مره ما كان لي نفس اكل حاجة وباقي طلقي ما اكلت شي ..
كنت مجهزة بعلبة زيت زيتون مع زيت حبة البركة ودهنوا فيها ظهري وبطني حسيت دفاني وساعدني..
كنت احيانا وقت الطلقات ارجف كل جسمي يرتجف خصوصا لما كنت بالبانيو او تحت الدش (لاحقا)..
كنت وقت الطلق احيانا اقرا سورة الزلزلة زي ما وصى الشيخ ابن عثيمين بقولها وقت الولادة..
بدأ وقتها (بعد الطلق بساعتين ممكن) ينزل علي دم شوي ومرات يزيد زي دم الدورة خصوصا مع زيادة الطلق (طبعا طبيعي هذا يعتبر دم مخاض)..
اكثر شي يهون علي ان ذروة الم الطلقة هي فقط ٢٠ ثانية ، كنت افكر بهذه العبارة مع الطلق عشان اتحمل واصبر، كنت مع الالم ودي اروح المستشفى خلاص بس ارجع افكر ايش الفايدة؟ ايش حيسوون لي دام لسا مو وقت خروج البيبي؟ بقعد على سرير بغرفة باردة وناس غرباء داخلة خارجة وتوتر، على الاقل انا الحين بالبيت مرتاحة واسوي تقنيات تخفيف الم كثير واكل واروح حمام واتحمم وخصوصية وانوار خافتة ف راح اتحمل اكثر..
تقريبا دخلت البانيو الساعة ١ ص (اخر الليل) قعدت فيه حوالي ساعة بعدين تعبت وخرجت على السرير وتدهنت بزيت ولبست شراب وتدفيت، لما كنت على السرير كنت احط تحتي مفرش طبي عازل لان ينزل دم مع انه مو كثير او البس فوطة.
قعدت كمان حوالي ساعة على السرير مع الطلقات احاول اتنفس وهم يضغطوا على اسفل ظهري اثناء الطلقة واشرب مويه واحاول ارخي جسمي ما اشده مع ان مرات اشد غصب عني لان الالم صار يزيد..
بس سبحان الله مع شدة الم الطلق كانت يجيني نوم مره بين الطلقات ..
ع حوالي الساعة ٣ امي وزوجي صاروا خلاص يبغوني اروح المستشفى لان صار الطلق مرره متتابع ومدته طويلة بس كنت رافضة اروح لين احس بشعور الدفع او شعور تبرز زي ما وصفوه لان كانت اول ولادة لي ومعرف ايش الشعور، ووقتها باقي ما كنت احس باي ضغط بالمنطقة تحت.
اعتقد من الاشياء اللي خلتني اتحمل بالبيت هو شعوري بالخوف من المستشفى غير انها مكان مو مريح مو زي البيت، بس كنت خايفة كل اللي افكر فيه (اخاف اوصل والرحم ما فتح كثير ولا اطول عندهم ساعات او يوم او اتعذب من توجيهاتهم واوامرهم ولمباتهم البيضاء الساطعة او يحولوني قيصري لانه مقعدي او او او….)
ف خلاص صرت احاول اتحمل الالم بس عشان اوصل لهم واصلة وحقيقة الالم بفضل الله كان محتمل ويقدر الواحد يخففه بتقنيات او يشتت نفسه او يتصبر ولو شد جدا، كان عندي ايمان ربي ما راح يحطنا بامر فوق طاقتنا وتحملنا ولازم كمان بعدها نثق بقدرتنا وفطرتنا اللي خلقها الله.
على الساعة ٣ ونص تقريبا بديت احس بضغط خفيف اسفل بالمنطقة والطلق زاد فرحت الحمام بس مافي حاجة لكن زاد الدم، جبت كرسي وجلست عليه بالمقلوب (يعني وجهي بظهر الكرسي) عشان اوسع حوضي وكان بيدي الدش الحار احطه على جسمي وظهري اكثر شي والطلقات صارت مرره متتابعة ورا بعض وطويلة، واحيانا مرات قليلة قصيرة..
طبعا انا وقفت حسبة الطلق بالتطبيق من الساعة ٢ وكان وقتها الطلق يجيني كل ٤ او ٣ او ٥ دقايق ومدة الطلق دقيقة او ٥٠ ثانية او ٤٠ ثانية.
صاروا اهلي يصروا نروح المستشفى وانا اقول لا باقي باقي مو الحين.. بعدها بردت مره لان شتاء واخر الليل تحت الدش ما تحملت، فرجعت للسرير تدفيت والطلق زاد جدا المه بس سبحان الله بين الطلق اناام واحس اني طولت جدا بالنومة واصحى بس وقت الطلقة (زوجي يقول ان الطلق وقتها كان جدا متتابع كل ٣ دقايق او ٤ تقريبا) بس انا مع النوم كنت احس ان الوقت طوييل بينهم لان كانت غفواتي عميقة..
ع الساعة ٤ صرت احس مع الطلقة بشعور كانه شعور تبرز قوي غصب عني، جريت للحمام احسب بيطلع مني شي بس مافي حاجة كنت مستغربة مره، وقعدت بالحمام وجاني نفس الشعور مع الطلق بس برضو كانت بطني فاضي تماما، طبعا لاني بكرية ما كنت اعرف ان هذا هو شعور الدفع اللي يقولوا عليه، لما تكرر عرفت انه هذا هو الدفع ..
رجعت ع السرير وما علمتهم خفت يقولوا يلا على المستشفى خصوصا ان امي طول طلقي تقولي لو جاك شعور دفع لا تدفعيين كانت خايفة اولد بالبيت، مع ان كنت اتمنى اولد بالبيت بس عشانه مقعدي شوي كنت خايفة (رغم وجود تجارب كثير لولادات مقعدي منزلي ناجحة)..
انسدحت ع السرير وبين ركبي مخدات وصار الطلق مره مؤلم مع شعور دفع وكنت ادفع معاه بقوة لا ارادي ..
رغم اني عارفة المفروض وقتها خلاص اروح المستشفى لما ابدأ احس بالدفع ولما يصير الطلق متتابع بس برضو كنت خايفة اروح بدري فصبرت شوي لين وصلت لمرحلة صرت احس ودي اصرخ مع الطلقة والدفع صار اقوى وقلت يلا مستشفى وبسرعة لبست وخرجنا من البيت ع ٤ وثلث قبل الفجر، نزلت من الدرج وحسيت معاه كأن البيبي نزل اكثر وتوسع حوضي وجاتني طلقتين قوية مره ، غصب عني وقتها سويت قرفصاء لا ارادي حسيتها اريح وضعية للدفع وصرخت ب اعلى صوت وصل صوتي لاخر الشارع😂، ولما راحت الطلقة جرينا على السيارة قبل تجي اللي بعدها، انسدحت بالسيارة ورا ع جمبي اليسار ومخدة بين ركبي وجاتني اكثر من طلقة وكنت ادفع غصب عني، وصلنا المستشفى حوالي ٥ الا ربع ممكن..
دخلوني طوارئ الولادة غرفة الفحص شافوا النبض والطلق ووضعية البيبي اللي كانت مقعدي طبعا وتوسع الرحم ونزول البيبي للحوض..
سألتها عن التوسع وقالت ١٠ سانتي الحمدلله ونزول البيبي للحوض كان ٢+ ماشاء الله..
بعدها جاتني طلقة حسيت فيها ان فيه حاجة طلعت مني ولما راحت الطلقة تحسست بيدي حسيته شي طري وكروي كذا وحسبته جسمه صرت اصيح طلع طلع وقالوا لا هذا كيس الجنين بس، ومع الطلقة الثانية انفقع الكيس وطلعت مويه غامقة خضراء بني حاجة زي كذا ناسية ما كنت مركزة بس انها مو صافية كان النونو متبرز.
بالمستشفى ارتبكوا مره انه مقعدي وقالوا لازم قيصري لانه وانا رافضة واقولهم اتفقت مع دكتورتي نادوها وهم توتروا لان يقولوا دكتورتي استدعوها بس مدري ما ردت او حاجة واستدعوا استشاري ثاني بس الاثنين ما وصلوا، ما كان فيه غير اخصائية هندية يزينها تهديني وتقولي بولادة المقعدي ما نتدخل ولا تدفعي هو حينزل بنفسه بس تنفسي واسترخي..
اثناء الطلق وقعوني ع اوراق كثير منها اني بولد طبيعي مقعدي على مسؤوليتي واني ما ابغى الاستشاري اللي جابوه وما ابغى رجال يولدني (لان دكتورتي كانت اخصائية والمفروض ع قولتهم المقعدي استشاري يولده)
نقلوني لغرفة الولادة وسألوني اذا سويت مسحة بكتيريا gbc وقلت لا (قررت ما اسويها بعد ما بحثت بعمق عنها ) قالوا اجل لازم نعطيك مضاد ورفضته، وجو بيعطوني مغذي ورفضت حسبته جلوكوز لان ما ابغى يجي للبيبي سكر فيصير لازم يعطونه بعد الولادة كمان سكر عشان الانخفاض وغير اني ما ابغى شي بيدي يقيدني بس قالوا لي انه مو سكر ومحلول بس وحطيته بس دقايق وشالوه هم مدري ليه اثناء الطلق..
وصلت دكتورتي وكانوا يبوني منسدحة او شبه مستلقية وانا مو قادرة، مصرة اقعد جالسة، احس انكتم وانا منسدحة ومقدر ادفع واتحكم وقت الطلقة واحس حوضي يصير اضيق ف كانوا كل شوي يخفضوا السرير وانا ارفعة بالازرار من جهتي لين استسلموا، ف استقريت بوضعية جالسة او شبة جالسة وهم مثبتين رجولي عشان ما اقفلها ، وقت الطلقة يرفعوها، وبين الطلقات ارخي وامدها عشان ارتاح…
والدكتورة حاطة كرسي وجالسة تنتظر يطلع الجسم، قعدت ساعتين ادفع وبوسطها كنت خلاص بفقد الامل لان مو معقولة ادفع وما طلع جسمه كل ذا الوقت واظن لو اني اتحرك او امشي كان ممكن نزل اسرع رغم انه كان قريب بس ما كان فيني طاقة
وكنت تقريبا مع الالم للاسف مرات اصارخ مع الطلقات او اصيح بدعاء او احاول اتنفس بس ما قدرت استرخي وقت الدفع وقالوا لي بعدها ما اضيع الطلقة او اضيع طاقتي بالصراخ، بدالها احسن احطها بالدفع باني اخذ نفس ثم اكتم نفسي وادفع على تحت زي التبرز مع ان كنت اصلا ادفع غصب عني بس يبغوني اركز اكثر وادفع اقوى.
رغم اني كنت عارفة كل هذا وكنت قارية ان هذه الطريقة غلط واحسن اتنفس واسترخي عشان تتوسع المنطقة وعشان يطلع بشويش وما يحصل تمزق ولان اصلا الرحم يدفعه بنفسه، بس وقتها خلاص بس ابغى اولد واخلص ف سويت طريقتهم السريعة وكنت احس وقتها انها فعالة لكن متعبة..
سبحان الله فجأة صارت طلقاتي اقصر ما الحق ادفع الا خلصت الطلقة وكنت اريح بين الطلقات او احاول اغفو وباخر ساعة اعطوني اكسجين اظن فيه مسكن كنت اخذه بس بين الطلقات وحسيت ريحني او خلاني اتنفس زين (امي كانت جالسة برا عند الباب وطلبتهم يعطوني اياه يخفف عني).
طلقاتي لما شافوها قصيرة كذا قالوا لو نعطيك طلق صناعي شوي ترا حيساعدك ويقوي الطلق ويخليه اطول بس رفضت قلت لهم ما عندي مشكلة اتحمل مهما طولت..
واظن طلقي صار اقصر بسبب التوتر وقتها بالمستشفى والاخذ والعطا الكثير معاهم، عكس بالبيت لما كنت مرتاحة ومسترخية ومافي احد يوترني ولا خايفة..
كنت رغم الالم احاول اركز بكل ما فيني بكل حاجة يسووها واي شي يعطوني اياه واسألهم..
اعطتني ابرة بنج بالمنطقة قالت عشان لو احتاجت تقص وذكرتها بوعدها بعدم قص العجان وانها ضده وقالت لي بس ضربت الابرة احتياط..
لما طولت بالدفع شوي شفتها مسكت المقص وصرخت منعتها وحلفتها بالله ما تقص قلت لها عادي يصير لي تمزق وشق طبيعي ولا انقص وانا عادي متحملة الالم مهما طولت او توجعت وحرام انقص عشانكم مستعجلين وانتِ وعدتيني وو …
ف حطت المقص على جمب ومعد مسكته.
الحمدلله ولدت الساعة ٧ ونص الصباح بعد دفع لمدة ساعتين تقريبا وحسيت وقت طلوع البيبي بحلقة النار اللي يقولوا عليها سبحان الله.
بالاخير جات طلقة طويلة ودفعت بكل قوتي وربي يسرها وطلع جسمه او تحديدا مؤخرته وكان وضعيته ظهره على ظهري، الدكتورة تقولي ان من يوم شافت مؤخرته طلعت برا على طول مسكته ولفته وخلت وجهه على تحت وظهره على فوق ثم طلعت حبه حبه رجوله ثم يدينه ثم دخلت يدها من تحت جوت الرحم تدور فمه عشان ترخي راسه فتقول لقت فمه مفتوح ومسكته وخفضت راسه خلته مدنق عشان تقول لو رفع راسه وطلع كذا ممكن يعلق (رغم ان فيه تجارب كثير لولادات مقعدية سليمة بدون اي تدخل كذا واللي اعرفه هذا النظام الحديث انهم ما يتدخلوا الا عند الحاجة) وبعدها طلعته بدون سحب مدري كيف..
هذا كله حصل بثواني وحسيتها حقيقي ثواني لان شفتها مع الطلقة وقفت وبسرعة سوت كذا ولقيت بعدها ولدي فجأة بحضني ع فخوذي وانا جالسة..
ثواني وبكي وهم يمسحوا بقوة على ظهره عشان يحفزوه يبكي ويشفطوا فمه وانفه..
كنت بالطلقات الاخيرة اعيد عليهم ما يقصوا الحبل السري اول ما يطلع ويخلوه عليا ، كنت اعيدها و ما يردوا علي..
رغم كذا خلوا الحبل وما قصوه قلت لهم ابغاه يصير ابيض وقالوا يلا بس ٣ دقايق بس وتروني كل شوي يقولوا يلا يلا وتجيب الدكتورة المقص وانا امنعها وابعد يدهم وهم كانوا الحقيقة مستعجلين وقلقانين عشانه متبرز واكل من برازه بس انا ادري انه طبيعي ومو خطير ان شاء الله.. ويقول زوجي اول ما شالوا البيبي مني وحطوه على سريره على طول استفرغ كل اللي اكله من براز سبحان الله..
كنت اتمنى مره الساعة الذهبية او ربع ساعة حتى انه يبقى بحضني وارضعه واعيش هذه اللحظات بهدوء بعد الولادة ويتأخر الفحص عليه بس ما حصل للاسف.
بس عموما خلوه لين جوا يقصوا وقلت وروني الحبل السري لان كل ما احاول ادوره مو شايفته ووروني اياه لونه ابيض وسمحت لهم يقصوه واخذوه ع طول..
العجيب ان لونه صار ابيض بدقيقة تقريبا او دقايق قليلة او ثواني مدري بس حسيتها سريعة مره كأن طلع وهو لونه ابيض..
بعدها بدت اصعب فقرة واللي حسيتها مؤلمة اكثر من الولادة للاسف..
كانوا بيعطوني بعد الولادة ع طول حاجة كذا زي الطلق الصناعي عشان تمنع النزيف وتسرع خروج المشيمة..
بس رفضتها من قبل ووافقوا..
على طول بعد ما اخذوا ولدي بدوا بشغل خروج المشيمة ولا عطوني اي دقيقة او فرصة انها تخرج من نفسها، كأن الدكتورة كانت ماسكة الحبل تسحب بشويش او حاجة والممرضات يضغطوا ع بطني ضغطات قوية كانت مره مؤلمة، كنت اصيح ما يسحبوا المشيمة واكرر وهم يقولوا مستحيل اصلا نسحبها ممنوع حيجيك نزيف وحنا بس مدري ايش نسوي.. وكرروا حركتهم لين طلعت المشيمة، انقهرت انهم كانوا مستعجلين خصوصا الدكتورة سواقها كان تحت وما صبرت علي لين اطلق وتطلع المشيمة من نفسها..
بعدها كأن جاني نزيف بسيط بالرحم وتوتروا وعلى طول ضربوني ذيك الابرة اللي رفضتها قالوا اضطرينا عشان نوقف النزيف..
بعدها الدكتورة دخلت يدها بالرحم عشان على قولتهم تتاكد مافي بقايا او تنظف او حاجة، صرخت صراخ ما صرخته بالدفع من شدة الالم مع انها ما طولت.. رغم انه كان يمديها تشوف ان المشيمة خرجت كاملة ليه تدخل يدها عشان تتاكد وتاكدت من صحة معلوماتي بعدين ..
قالوا جروحي شق من الدرجة من الاولى الحمدلله وداخلية لكنها كثيرة ومتفرقة..
طلبتها ما تخيطها دامها بسيطة وقالت طيب بس لازم تخيط الجروح اللي قاعدة تنزف لكنها خيطت كثير مره..
طولت شوي بالخياطة عشانها جروح متفرقة وقالت لي وقتها وحدة من الممرضات “مو لو خليتينا نقصك كان احسن من كذا” قلت لها لا لو انقصيت ف القص اعمق والالتئام اصعب، جات ترد عليا بس ردت الدكتورة بدالي قالت للممرضة ان كلامي صح وان الشق ارحم من القص طبعا وان القص اصعب وعميق والتشافي منه اطول والقص بنفس العضلة مو مثل الشق بالماء اللي بين الخلايا.
بعد ما خلصت خياطة دخلت شاش (وكانت حتى هذه الحركة جدا مؤلمة) عشان تقول ان الجروح تنزف وتبغى توقفه ولازم الشاش يقعد ساعتين ثلاث وبعد ساعتين تقريبا لقوا باقي نزيف شوي وحطوا شاش ثاني وقعدت بنفس الغرفة تقريبا للمغرب بعدين شالوا الشاش ونقلوني لغرفة الافاقة.
بعد الولادة ركبوا لي قسطرة مدري ليه بس كنت بكل الاحوال مافيني مع التعب اتحرك او اروح الحمام او اقوم من السرير، رغم ان الظهر جوني قالوا ضروري اتحرك ولما جلست على السرير على طول جاني هبوط ودوخة، قعدت تقريبا كذا لين ثاني يوم حبة حبة امشي عشان الخفقان .. بس فكيت القسطرة بالليل على مسؤوليتي مع ان كانوا يبوني اخليها لثاني يوم الصباح عشان خايفين من كمية السوائل اللي تطلع ويبغوا يطمنوا من حاجات بس طلع بالاخير ما فيني حاجة الحمدلله.
بالنسبة للنونو رفضنا يحطوا له المضاد الحيوي مرهم العين (لانه وقائي للامراض الجنسية ف ماله داعي بس تقليد للغرب)
ورفضت يعطوه وقتها اي حاجة مثل تطعيم او ابرة فيتامين ك..
ابرة فيتامين ك اجلتها للعصر والتطعيم رفضته قلت انا بعطيه بعدين ابغاه يكبر شوي ويصير اقوى (لو عليا وتيسرت ودي ما اعطيه تماما ويارب تتيسر لي..)
قريت بسونار اللي سويته قبل ولادتي بيومين ان الحبل السري ملتف ع رقبته لفة وحدة والحمدلله تاكدت وقريت انه طبيعي ومو خطر.
اخيرا استعينوا بالله واحسنوا الظن به واكثروا من الدعاء قدر الامكان ثم تثقفوا كثير ، فادتني جدا هذه الكتب الثرية بالمعلومات (الولادة الطبيعية دليل اسبوعي للحمل والولادة + معا نحو حمل آمن وإيجابي + هذا جسمي وهذا طفلي + اماني للولادة الطبيعية ) وقبل الولادة كتاب (الافادة فيما جاء في ورد الولادة) لاوراد الولادة، وفادتني قناة ملف الولادة الطبيعية للدولا اماني في التلجرام.